Kia ora koutou mā
I te tuatahi tēnei te mihi ki a Kere, Ko koe te toa i tēnei rā. Tino pai te haere o te pakiwaitara! Ka tuku imera ki a koe ākuanei.
He whakataetae te Māwhai Tuhituhi. Kua oti kē ngā whiti e toru, kei a koe te whiti tuawhā. Āpiti atu tō tuhituhi ki te pakiwaitara ia rā, mō ngā rā 21-25 o Hūrae.
Mēnā ka hiahia koe ki te uru ki te whakataetae haere ki te whārangi o te māwhai tuhituhi, pāngia te pikitia “māwhai tuhi” ki runga rā , āpiti tō tuhi ki te wahanga tuhi ki raro nei rānei.
Ka whiriwhirihia kotahi te whiti ia rā hei wini i te taonga o te rā, ki te wikitoria i te taonga nunui pea, ā, ki te hono ki te pakiwaitara mo te whiti o te rā.
Ki a koutou katoa ….karawhuia!!! Tuku mai tō tuhituhi, mahau te whiti tuawhā pea?
Ānei te tīmatanga o te pakiwaitara……
Kua horoia ngā rīhi, ka paoho mai te pouaka whakaata, “I tēnei wā ka huri ki ngā matapae huarere mō āpōpō, tērā te whakatūpato a Te Ratonga Tirorangi, he āwhā, he hau āwhiwhio …” Kātahi ka weto te pouaka whakaata! Ka weto ngā raiti o te whare! Kua pō uriuri.
Ngaro hirea ana nga tangi o te ao. Matapiko ana te hau awhiowhio i waho, ka tau. PAKO! Keko ana te tiro a Pita i te aro pena o te hitawe. Ka taka te mahana o te whare, kui ana te hau o roto. Pakaru ana tana hamuti i te kitenga o te atarangi a tana Kuia.
E kui, kaua koe e whakapupuni atu i ngā kokonga o te whare, i whakaaro au ko koe tētahi tangata kōhuru, tata au ki te tioro. Ka kata pai te kuia, ānei te rama e Makere, tērā pea mēnā ka kite koe i tētahi tangata kōhuru, karanga mai, mā tāua ia e whakarau!
…….ka aha nāianei?
Pihitahi
Wiriwiri katoa tana tinana, ka hemo. “Pita, e oho!” Matike ake a Pita i te karanga a tana mama. “E ta, na te aha koe moe ai i runga i te papa?” “E aua e ma. Ehara ahau i te tama heahea, engari i kite ahau i te atarangi a kui inapo! i weto nga rama, kata-” “Whakamutua Pita! Kei wiwi, kei wawa o whakaaro, kaore a kui mo te hoki mai” Matarehu ana te kite a Pita, ka rere a roimata. Ka huritao ia ki te matenga o tana Kuia.
Ranui
I tono mai tōna hākui kia hauhake i ētahi tāwhaowhao mai i te taha moana, hei kai mā te ahi. Nā te wiriwiri me te makariri o tōna hākui, kāore a Pita i te takaroa, i mau i tana pakē , i oma tōtika ia ki te moana. Ka eke i te wiwī, ka eke i te wawā, ka tae ki te moana. Mākere mumu, hupe tautau!. I tere mahi a Pita, kī ōna ringa ki ngā tāwhaowhao. Kotahi atu ia ki te kainga. I tahunatia e Pita te ahi. E kore e rangirua tōna pūmau ki tōna Hākui. Ka heke ngā roimata i ōna karu ki te kite i tōna hākui e noho mahana ana.
Tohu Ana-Te-Rangi
I roto i te matapihi i kitea i tetahi tangata kohuru pera ki nga korero ta kui, “E KUI, E KUI, HAERE MAI!!” I ohorere te tangata engari i haere tonu ki roto i te matapihi ki te tikina i ahau engari ara a kui e patua ana i te tane me tona peke, ka tangohia ia i tona huna kanohi a ka ki ia “Nau tenei whare?” ka whaka utu a kui “ae haere atu kaore koe ka noho ki konei, inaianei!!” ka tiro te tane ki ahau,a, ka patai ia ” He aha tou ingoa e tama?” Kaore ahau ka taea te whakautu, kaore toku waha ka whakae moku ki te whakaputa toku ingoa ki tenei tane.
Hapina
Matapōrehu ana te ngakau, i te tirohanga atu i ta hākui ātanga. Mahue ake ia māua ko Pita, he mahara noa.
Mātai atu ana ki te hākerekere pō, e tāwhana kau mai ana i waho. TAKE! TAKO! Taka rawa he hau kāripiripi, e haehae ana ki waho. He whaititiri ki te rangi, he ngākau kakapa noa, nō roto ia māua ko Pita. Māhea mai he hau pūangiangi i te atatū. Koke atu kia Kōka ka mea, “E mā, turuapo ana i te pō engari mātai tonu atu te ātanga o hākui ki a māua ko Pita. Ki te hemo te tangata, ka ora anō?” Ka urupare a Māmā, “E hika, me pēhea au e kī. Kua hemo atu a Kui, e kore ia e hoki mai anō”
Nau mai anō te pō, hui anō te ātanga o Kui i te kokonga o tā mātou nohomanga. Ka tiro makutu mai a Pita ki au, ka mea ” he moemoeā tēnei?he aha rawa rānei?”. Ka wehi māua ko Pita.
Mānukanuka katoa māua. Hūkere atu ta māua tarapeke ki te rūma o Māmā.
“Mā! Mā! Kua hoki kau mai a Kui. He aha tēnei hanga?……. He hanga nō tōna matenga pea?”